ગઝલ / હેમંત ગોહિલ
આ વસ્ત્ર એક જો વણાય તોય છે ઘણું ઘણું ,
મળ્યું છે એટલું મણાય તોય છે ઘણું ઘણું .
જવાબ તો બધાય પ્રેમમાં મળી જશે પછી ,
સવાલ એક હા ભણાય તોય છે ઘણું ઘણું .
કહે કબીર: ઈશ તો અસીમ 'ને અમાપ છે ,
જરાક જેટલો જણાય તોય છે ઘણું ઘણું .
નવો નથી ઉગાડવોય મોલ મારા ખેતરે ,
ભરેલ કણસલા લણાય તોય છે ઘણું ઘણું .
ભલે ન ભીતરે જવાય મુક્તકો તપાસવા ,
બહાર છીપલાં ગણાય તોય છે ઘણું ઘણું .
અહી હરે ફરે અપાર ઝૂંડ એષણા તણાં ,
કદીક એકબે હણાય તોય છે ઘણું ઘણું ,
No comments:
Post a Comment