ચકલી ઉર્ફે તું / હેમંત ગોહિલ 'મર્મર '[વિશ્વ ચક્લીદિન સ્પેશ્યલ ]
અજવાળાનું બિબુ ચકલી ,
અંધારાનું છીબું ચકલી .
ચકલી મતલબ ચપટીક સૂરજ લઈને વહેતું ઝરણું ;
ચકલી મતલબ તારી આંખનું સપનું કંકુવરણું .
ચીંચી નો વરસાદ ચકલી
પરોઢનો પરસાદ ચકલી .
ચકલી ઉર્ફે ઈશ્વર ઉર્ફે કાવ્ય ઉર્ફે કાવ્યનો વિસ્તાર ;
ચકલી ઉર્ફે ઋચા ઉર્ફે આરત ઉર્ફે જીવતરનો છે સાર .
ભોળપણનો આકાર ચકલી ,
ખીંટી નો શણગાર ચકલી .
ચકલી ઉર્ફે ભરચક ભરચક દરિયો બાંધ્યો ટીપે ,
ચકલી ઉર્ફે અઢળક મોતી વેરી દીધાં છીપે .
ચકલી મતલબ મારી ઈચ્છા ,
ચકલી મતલબ તારી ઈચ્છા
ચકલી ઉર્ફે ભોળું ભોળું સમણું છે નવજાત ,
ચકલી ઉર્ફે હરતીફરતી રંગોળીની ભાત .
ચકલી ઉર્ફે ઈચ્છા ઉર્ફે તું ઉર્ફે ..............
સૂરજ એટલે ....
સૂરજ એટલે ---------------
રાતમાં ધોધમાર પડેલા અંધારના મેહ પછી
મોંસૂઝણની મીઠી મીઠી વરાપમાં
ધરબાઈને ઊગેલું
કૂકડાની બાંગનું બીજ .
સૂરજ એટલે ....
- હેમંત ગોહિલ 'મર્મર '
અટકવાની શરૂઆત વિશે.......
અટકી જા ,કહું છું દોસ્ત !
જો,
આ અહર્નિશ આથડતો ;
હણહણતા અશ્વ શો અબ્ધિ
આખર શું પામશે ?
................વેરાઈ જતા અસ્તિત્વના કેવળ ફટકિયા ફીણ .
કાલે જ તારું બેફામ ઊછળતું રક્ત
ગોકળગાય થી હાર્યું ------- ભૂલી ગ્યો ?
વસૂકી ગયું હતું ઉછળવું ?
ક્ષણોના મારનારને મરેલી ક્ષણો જ મારે છે .....
રોપી દે ,
એક કૂંડામાં નામ તારું ,
સપનાના જળ સીંચ
ટૌકાની ડાળ ; હીંચ
વ્યાપી જવા દે તારા લીલાછમ અસ્તિત્વ ને પાંદેપાંદમાં .
જેનું ઉગવું મૂરઝાઈ ચૂક્યું છે
એવા બીજને વાવવા જેવા ધમપછાડા શીદ ?
...... સ્વ . કોઈને છોડવાનો નથી .
ઇચ્છાઓનો ભારેખમ ભારો મૂકી
પોલા અસ્તિત્વને
ભાંગવાની તારી વ્યર્થ ચેષ્ટા નો અર્થ શું ?
મંગળફેરા ફરે છે ,ખ્યાલ રાખ ,
મૃત્યુની દુલ્હન પણ અખંડ ધણી ઈચ્છે છે
................
...... એટલે જ કહું છું , દોસ્ત !.......
- હેમંત ગોહિલ 'મર્મર '
દીવાસળીના લઘુ કાવ્યો / હેમંત ગોહિલ [ સાત લઘુ કાવ્યો ]
[1] દિવાસળી બળી ગઈ .....
એટલે દીવો સળગી ગયો .
[2] તું દિવાસળી ત્યાં ઘસ મા
નથી બાકસપણું બાકસમાં .
[3] દિવાસળી ઓલવાઈ ગઈ , દીવો પ્રગટાવીને .....
[4] બાકસ તો નરમાં નથી ને દિવાસળી તો નારી ,
તોય જન્માવે ઝળહળ જ્યોત ,કેવી છે બલિહારી !
[5] બાકસ નહીતર એમ કંઈ સળગે નહીં ,
નક્કી જ કોઈએ દિવાસળી ચાંપી હશે .
[6] તણખા ઝરે છે જો હજી ,
ખાલી થયેલા બાક્સે .
[7] દિવાસળીના ટોપકા માં હોય છે ટોળું ગઝલ
તણખા કરીને શબ્દના હું આગની ખોળું ગઝલ .
વાહ ,ખૂબ સુંદર
ReplyDeleteI found the web interesting.. Tamaro shabd vadhu pranavan bano..e shubhechaa
ReplyDelete