Wednesday 13 March 2013
ગીત ..... આતે કૌતુક કેવું !
આતે કૌતુક કેવું ? !
મીરાં કહે છે મોર ચણે છે ,રાણા કહે પારેવું .
પડી નગારે ડાંડી ચહુદીશ શંખ ફૂંકાવા લાગ્યા ,
મીરાં મંદિર હાલ્યા , રાણા રણમેદાને ભાગ્યા .
મીરાં કહે છે ઝાલરટાણું ,રાણા કહે યુદ્ધ જેવું ......
મીરાં ચંદન ઘસતા રાણા સમજ્યા કે તલવાર્યું ,
કુમકુમ તિલક ભાલે કીધું રક્તબિંદુત્યાં ધાર્યું .
મીરાં મંદિર નખશિખ નીરખે , રાણા એવું એવું ...
રાણા કહે પથ્થરિયા ગઢ મેં કોર્યા ઠામે ઠામ
મીરાં કહે સાગમટે આંગણ આવ્યાં શાલિગ્રામ
મીરાં કહે વરસાદ પડે છે રાણા કહે છે નેવું .....
-હેમંત ગોહિલ 'મર્મર '
ગઝલ.... મળે છે
મન માને કે બાગ મળે છે ,
અંદર છૂપી આગ મળે છે .
રસ્તે રાખો જાત સલામત ,
ખિસ્સે ખિસ્સે ફાગ મળે છે .
ત્રિલોક હશે ત્રણ ડગલામાં ,
વામન રૂપે માગ મળે છે .
પથ્થર ડૂબ્યા એવું બોલી :
"તરતા કોને તાગ મળે છે ?
એજ વ્યથા ગણગણવી ગમતી ,
ગમતો જયારે રાગ મળે છે .
એક વખત છેડી 'તી મહુવર ,
રોજ હજીયે નાગ મળે છે .
મોત નથી મજિયારી મિલકત ,
આખે આખો ભાગ મળે છે .
- હેમંત ગોહિલ 'મર્મર '
Subscribe to:
Posts (Atom)