ચોમાસું / હેમંત ગોહિલ /"મર્મર "

તમારી વાતમાં છલકાય ચોમાસું ,
તમારા નામનો પર્યાય ચોમાસું .

નથી જળની હજી બારાક્ષરી શીખ્યા ,
પછી સંપૂર્ણ ક્યમ સમજાય ચોમાસું .

નહીં જો લાગણીનું સીમ રાખો તો ,
નહીં કવરેજમાં પકડાય ચોમાસું .

કરો જો બંધ બારી કે ધરો છત્રી ,
ભલા તોયે નહિ અટકાય ચોમાસું .

તમારી ઓઢણી અડકી જરા અમથી ,
અને  ત્યાં સામટું વેરાય ચોમાસું .

બને કે ગામ આખું બેખબર સૂતું ,
અને શેરી મહી ઝીંકાય  ચોમાસું .

અમે ખોબો ભરીને એટલે પીધું ,
ન ડીલે એમ કંઈ ચોળાય ચોમાસું .