આવજાવ હોય _________ હેમંત ગોહિલ "મર્મર "
ન બારણું છતાંય આવજાવ હોય ,
ખરે જ આંખનો સરળ સ્વભાવ હોય .
હજીય ધુમ્રસેર ધૂંધવાય સ્હેજ ,
કદીક કાફલાનો ત્યાં પડાવ હોય !
અવાવરું જગા તો ભીડમાંય હોય ,
હરેફરે છે શખ્સ એય વાવ હોય !
ન હાથ લાગતી કડી કદી જરાય ,
બનેલ ભીતરે ભલે બનાવ હોય .
હશે જ ભાત કૈ વસંતની ભરેલ ,
ન ચીંથરામાં એમ કંઈ લગાવ હોય !
બહાલ થઇ જતા તરત વગર વિરોધ ,
જો એમની જ આંખના ઠરાવ હોય .
બળીને ખાખ થઇ ગયું છે વન બધુંય,
ન દવ કદાચ હોય ; હોય દાવ હોય !
હજીય પાળ પર એ ઝાડ લીલકાય ,
તપાસતા તો મૂળમાં તળાવ હોય !