ગઝલ... સંજોગ તું
સંજોગ તું મીઠું હવે ભભરાવ મા ,
રૂઝી ગયેલા ઘાવને ચચરાવ મા
પોઢી ગયું છે સોડ તાણી સોણલું ,
ઓ શ્વાસ !તું સાંકળ હવે ખખડાવ મા .
સાંભળ જરા પાણી પણે તટને કહે :
નક્કોર પરપોટા નથી પપલાવ મા .
આકાશ ઊતરી ચીલઝડપે લઇ જશે ,
પાંખો અમસ્તી સ્હેજ પણ ફફડાવ મા .
વરસાદ તો બેઠો જ છે વરસી જવા ,
ભીની ભરેલી યાદને મમળાવ મા .
અમથો ઘસરકો વાઢ મૂકી જાય છે ,
કાજળ કરી નજરું હજી કકરાવ મા .
ફંટાય છે રસ્તો જ એના ઘર ભણી ,
નિર્દોષ પગલાંને પછી તતડાવ મા .
No comments:
Post a Comment