ગઝલ
લ્યો ,સાચવી લ્યો દાવને બાજી હજી બગડી નથી ,
આ વાત માની જાવને બાજી હજી બગડી નથી .
લીલાશ તો ત્યાં આપમેળે સામટી ઊગી જશે ,
તું વાદળી વરસાવને બાજી હજી બગડી નથી .
પંખી બનાવી દઈશ હું એને કલા - કૌશલ્યથી ,
એકાદ પીછું લાવને બાજી હજી બગડી નથી .
આ ઝાડને મ્હોરી જવા મોસમ નથી તો શું થયું ?
હળવે જરા મલકાવને બાજી હજી બગડી નથી .
સળગી રહી છે આ હવા પણ આજ દાહક રાગથી ,
મલ્હાર જેવું ગાવને બાજી હજી બગડી નથી .
એની મજા કંઈ ઓર ને રંગત અનેરી હોય છે ,
વાવડ વગર તું આવને બાજી હજી બગડી નથી .
No comments:
Post a Comment