એક તાજી ગઝલ / હેમંત ગોહિલ 'મર્મર '
હાથમાં ચપટી ભરી ગુલાલ રાખ ,
આંખમાં આંજી છલોછલ વ્હાલ રાખ .
માંગ છે મિત્રો સમયની આજકાલ ,
આંખને થોડી ઘણી તું લાલ રાખ .
એક ગંગા ઝીલવાની હામ હોય
તો જ બંધુ ! હાથમાં રૂમાલ રાખ .
એજ પગલું થાય કેડી , સાવધાન ,
પગ પહેલો મૂકવામાં ખ્યાલ રાખ .
માવઠાની મ્હેરથી કંઈ પાક થાય ?
મન અષાઢી મેઘ જેવું ન્યાલ રાખ .
સોગઠું ગાંડું કરી જગ મૂકશે જ ,
તું ભલેને સાવ સાદી ચાલ રાખ .
No comments:
Post a Comment