ગીત ....: મીરાં કમોસમી માવઠું નથી .......હેમંત ગોહિલ
મીરાં કમોસમી માવઠું નથી કે રાણા , ઘડીક વરસીને રહી જાશે ,
અષાઢી મેઘની હેલી એ તો હોનહાર ,આખ્ખોય મેવાડ વહી જાશે .
ફાટેલા આભ જેમ ખાબકતા મેઘ એને
કિયા કિલ્લાથી તમે ખાળશો ?
વેગીલા વ્હેણમાં વહી જાતા જળ એને
વારી વારીને કેમ વાળશો ?
ટળવળતો રાજમહેલ તડકે મેલીને મીરાં કેવળ ભીનાશ લઈ જાશે .
ઊંચા તોતિંગ એવા ગઢની આડશ બધી ,
પળમાં તો થઇ જાશે રેલો ;
ભીના તરબોળ થઇ ખરખરતા કાંગરા
જોશે મેવાડને ડૂબેલો .
કોરાકટ્ટાક સાવ તોયે રાણોજી તમે ? - એવું ઉઘાડ કહી જાશે .
- હેમંત ગોહિલ
[મોંઘી મિરાત મીરાં 'માં પ્રકાશિત . સંપાદક : 'સુમિરન ' પ્રકાશક :પ્રવીણ પ્રકાશન ,રાજકોટ .
No comments:
Post a Comment