ગીત .. હું તો લપસી પડી ...
તોય લપસી પડી ઈમાં ,મૂઈ ....
હરખુડી પાનિયુંને હમજાઈવું ભાળ્ય ,અલી મારગમાં ગૂડી છે કૂઈ ...
કોરોમોરો બાઈ મારો કમખો ભીંજાણો
એનાં કોરાપણાના વ્રત તૂટ્યા ,
અધકચરી ઊંઘમાંથી ઝબકેલા ઓરતા
ઓગળીને ગાંઠથી વછુટ્યા .
ભીની હોય ભોંય ત્યાંથી આઘા રે 'વાય કૈંક એવું હમજાવતી 'તી ફૂઇ ...
રેલાતી હાય હું તો હાલી ઉતાવળી ,
ફળિયું કળાય ત્યાંતો ઓરું ,
બાર્યનું તો કીધું ઝૂડી ઝાટકીને ઠીક -ઠાક
માલીપા કેમ થાવું કોરું ?
ઓલવાયા ભાનસાન એવા કે બાઈ હું તો ટેરવડે ટાંકી બેઠી તૂઇ ...
ઠાલી પડપૂછ કરે નખ્ખોદીયો વાયરો
પાણી ઊંડું કે ઊંડાં તળ છે ?
રેલાતી જાઉં હું તો ઢોળાતી જાઉં હું તો
જાણે કે જાત હવે જળ છે .
તેદુની આંગણામાં આવીને બાઈ મેંતો વાવી છે ઝીણેરી જૂઈ ...
No comments:
Post a Comment