ગીત
માટે ગોકુળમાં હડતાલ છે .
.............................. માટે ગોકુળમાં હડતાલ છે .
કાનજી કરીને એક છોકરાનું સાનભાન ચોર્યાનું રાધા પર આળ છે .
શેરીના છોકરાઓ કરતા વાતું કે આતો કેવી છે છોકરી ઘેલી ,
એક એક ઝાડવે ને એક એક પાંદડે છે કાનની વારતા લખેલી .
બેઠેલી હોય રોજ કદમ્બના છાંયડે ને યમુના હોય આંખમાં મઢેલી
કોક કહે : કાલ્ય તો મોરના પીછામાં એણે ચિઠ્ઠી લખ્યાની ભાળ છે
.............................. માટે ગોકુળમાં હડતાલ છે .
સમજણ મૂકી છે એણે શીકામાં ઝૂલતીને અધખુલ્લા રાખ્યા છે બારણાં,
નજરુંના નેતરાને વીંઝે છે આમતેમ હૈયે વલોવે છે ધારણા
પૂનમની ચાંદનીમાં બોળીને કોક દી માંજ્યા કરે છે સંભારણા
ફૂટેલી મટકીને પૂછે છે ગામ :"બોલ ,કિયા કંકર ની આ ચાલ છે
.............................. માટે ગોકુળમાં હડતાલ છે .
વ્હેલા પરોઢીયે વહેતી થઇ વાત કે રાધાને કોઈ ના બોલાવતા ,
વાતું તો થાય એમાં વાયરાને શું ? એતો રાધાનું મોઢું ખોલાવતા ,
થાકી હારીને છેક સાંજે બોલી છે રાધા ,મોરપિચ્છ હાથમાં ઝૂલાવતા
વાંસળીના સૂર મહીં ઘૂંટાતી વેદના 'ને ,વેદનામાં ઝાંઝરનો તાલ છે
.............................. માટે ગોકુળમાં હડતાલ છે .
No comments:
Post a Comment