ગઝલ ___________ હેમંત ગોહિલ 'મર્મર '
મને બારાખડીની બ્હારનો અક્ષર મળી આવેલ છે ,
ખરી ઓળખ બતાવી લઇ જજો ,ઈશ્વર મળી આવેલ છે .
તમે ચારેય દીવાલો વચાળે સાંભળો બ્રેકિંગ ન્યુઝ ,
નથી એક્કેય વચ્ચે ભીંત એવું ઘર મળી આવેલ છે !
બધાં તોરણ તમે લ્યો ,થાવ લીલાં : બારણે હુકમ કર્યો
પડેલું બંધ ખાનું ખોલતા અવસર મળી આવેલ છે .
નદીની બાતમીને લઈને રણની ધરપકડ કીધી હતી ,
તલાશી આંખની કરતા ભર્યું સરવર મળી આવેલ છે .
હવે તાળો દટાયેલા નગરની વારતાનો મેળવો ,
પુરાતનકાળના અવશેષમાં ઝાંઝર મળી આવેલ છે !!
No comments:
Post a Comment