ચકલી ઉર્ફે તું / હેમંત ગોહિલ 'મર્મર '[વિશ્વ ચક્લીદિન સ્પેશ્યલ ]

અજવાળાનું બિબુ ચકલી ,
અંધારાનું છીબું ચકલી .

ચકલી મતલબ ચપટીક સૂરજ લઈને વહેતું ઝરણું ;
ચકલી મતલબ તારી આંખનું સપનું કંકુવરણું .

ચીંચી નો વરસાદ ચકલી
પરોઢનો પરસાદ ચકલી .

ચકલી ઉર્ફે ઈશ્વર ઉર્ફે કાવ્ય ઉર્ફે કાવ્યનો વિસ્તાર ;
ચકલી ઉર્ફે ઋચા ઉર્ફે આરત ઉર્ફે જીવતરનો છે સાર .

ભોળપણનો આકાર ચકલી ,
ખીંટી નો શણગાર ચકલી .

ચકલી ઉર્ફે ભરચક ભરચક દરિયો બાંધ્યો ટીપે ,
ચકલી ઉર્ફે અઢળક મોતી  વેરી દીધાં છીપે .

ચકલી મતલબ મારી ઈચ્છા ,
ચકલી મતલબ તારી ઈચ્છા

ચકલી ઉર્ફે  ભોળું ભોળું સમણું છે નવજાત ,
ચકલી ઉર્ફે હરતીફરતી રંગોળીની ભાત .

ચકલી ઉર્ફે ઈચ્છા ઉર્ફે તું ઉર્ફે ..............