ગઝલ....શ્વાસ આપ
એક - બે ઉછીના કોઈને શ્વાસ આપ ,
જે ન માગે , દોસ્ત ! એને ખાસ આપ.
ખેવના વૈપુલ્યની ના નાથ કોઈ ,
આંખ ના અંજાય એ અજવાસ આપ .
સોય તો છે સાંધવા તૈયાર આજ ,
ફક્ત દોરા જેવડો વિશ્વાસ આપ .
ચીતર્યા ગુલાબનું હું કેનવાસ ,
આવ 'ને ખોબો ભરી સુવાસ આપ .
ઈશ્વરે દીધી તને ભૂગોળ આમ ,
તું રચી પાછો હવે ઇતિહાસ આપ .
હા , અધૂરો અંતરો પણ ઈટ થાય ,
આપ ,પડઘા જેમ એને પ્રાસ આપ .
શબ્દની હોડી તરાવું આજકાલ ,
હે હરિ !તું અર્થનો પ્રવાસ આપ .
No comments:
Post a Comment