ગીત
એવા સપનાને શું જોવું ?
સૈયર ,જાવા દેને, જાવા દેને , જાવા દેને .
ઝરણું એક્કે હોય નહી 'ને
ખળખળ જેવું લાગે ;
તરણું એક્કે હોય નહી 'ને
કુંપળ જેવું વાગે .
અમથું અમથું હોવું ,
એવા મોતીને શું પ્રોવું ?
સૈયર, જાવા દેને, જાવા દેને , જાવા દેને .
વાદળ નો અણસાર નહી 'ને
રિમઝિમ વરસે પાણી ;
ટહુકેલા સૌ ટહુકા લાવો
મોર કરે ઉઘરાણી
અમથું અમથું લ્હોવું ,
એવા આંસુ ને શું ખોવું ?
સૈયર ,જાવા દેને, જાવા દેને , જાવા દેને .
વા કહેવો કે વાલમ ?
એવો કોયડો ના સમજાતો ,
હરુભરું ઊભો છે તોયે
સ્હેજે ના પકડાતો
ટીપે ટીપે ટોવું ,
એમાં મુખડાને ક્યાં ધોવું ?
સૈયર ,જાવા દેને, જાવા દેને , જાવા દેને ....
- હેમંત ગોહિલ 'મર્મર '
Monday 25 February 2013
Subscribe to:
Post Comments (Atom)
No comments:
Post a Comment