ગીત 

ફાટેલ તૂટેલ સાવ ચડ્ડી ચડાવતુંક સામે આવ્યું રે મારું બાળપણ ,

દોથો ભરીને લાવ્યું દાદાની વારતાને લાવ્યું  ભિલ્લુની ગાળપણ .

એવું તો ઓળઘોળ પહેર્યું છે ગોળગોળ ,

આખ્ખું તળાવ એણે ડીલે ;

ડુબકીયા દાવ જે ખોયા 'તા ધૂબકે ,

કે 'તું કે  જળ તું ગોતી  લે .

ભીતરની ભાત એના થીગડે મળે છે 'ને ભાતીગળ સમણાની ભાળપણ .....

 કરીને પેંત દોંત ફેકેલા દાણીયા 

એની આંખોમાં હજી દદડે 

પૂછે પાંપણ એની ઢળીને સહેજ મને 

ગાયેલાં ગીત લીલા વગડે .

છાનું છૂપાવી લાવ્યું મખમલીયું ઘાસ અને લાવ્યું છે ડુંગરીનો ઢાળ પણ ...

વીખણશીખણ એના લ્હેરાતા ઓડીયામાં ,

કરે ઉત્પાત હજી હડીયું ,

હમ્ફાતા શ્વાસ માં રંગીન કાગળિયાંનું 

દડે છે હજી દડદડિયું .

ખાલી ખિસ્સામાં એવી ખખડે છે સાહ્યબી કે લંબાવે હાથ ટંકશાળ પણ ....

ફરતા ફરફરિયાંમાં ફેરવ્યો 'તો વાયરાને 

એનો રોમાંચ રુંવે -રુંવે ;

મળેલા મન જેવી મીઠી એ શેરડીનો 

ભીડેલા હોઠ સ્વાદ ચૂવે .

મુઠ્ઠી ભરીને લાવ્યું માણેલી મોજ 'ને લાવ્યું છે ચપટીક ફાળ પણ ......

                                                      

                                                            ...- હેમંત ગોહિલ 'મર્મર '